Rhywun sydd wedi cael ‘statws ffoadur’ gan Lywodraeth y DU. Gall hyn fod trwy gynllun ailsefydlu neu drwy gais llwyddiannus am loches. Fel arfer, mae rhywun sy'n cael statws ffoadur yn cael caniatâd i aros yn y DU am 5 mlynedd.

Er mwyn bod yn gymwys i gael statws ffoadur, bydd yn rhaid i chi ddangos bod gennych “ofn ac iddo sail gadarn y cewch eich erlid am resymau hil, crefydd, cenedligrwydd, aelodaeth o grŵp cymdeithasol penodol, neu farn wleidyddol, a chithau’r tu allan i’ch gwlad enedigol, ac yn methu â chael eich amddiffyn neu, oherwydd yr ofn hwnnw, yn amharod i geisio cael eich amddiffyn gan y wlad honno” (Confensiwn Ffoaduriaid y Cenhedloedd Unedig, 1951).

Cynllun a ariennir gan Lywodraeth Cymru ac sy'n cael ei redeg gan Gyngor Ffoaduriaid Cymru yw hwn. Mae'n rhoi cyngor a chymorth i ffoaduriaid yn ystod y cyfnod ‘symud ymlaen’ o 28 diwrnod’. Gall Cyngor Ffoaduriaid Cymru eich helpu i gael mynediad at lety, cyfrifon banc, taliadau nawdd cymdeithasol a mwy.

Rhagor o wybodaeth ynghylch sut y gall Cyngor Ffoaduriaid Cymru eich helpu.

Os gwrthodir eich cais am loches, bydd y Swyddfa Gartref yn gofyn i chi ddychwelyd i'ch gwlad enedigol yn wirfoddol. Os na allwch wneud hynny neu os na fyddwch yn fodlon gwneud hynny, gall timau Gorfodaeth Fewnfudo'r Swyddfa Gartref geisio eich gorfodi i ddychwelyd. Gallant wneud hyn trwy eich rhoi dan gadwad ac yna’ch allgludo, mewn proses a elwir yn symud.

Disgwylir i'r rhan fwyaf o geiswyr lloches nad ydynt wedi eu rhoi dan gadwad fynychu canolfan fynychu neu orsaf heddlu yn rheolaidd. Gallai methu â bodloni'r amodau mynychu a osodwyd arnoch gan Lywodraeth y DU fforffedu eich hawl i loches ac arwain at eich symud o'r DU.

Mae Llywodraeth y DU yn derbyn ffoaduriaid yn uniongyrchol o wersylloedd mewn rhannau eraill o'r byd ac yn darparu diogelwch o fewn y DU. Mae Llywodraeth y DU yn gweithio gyda'r Cenhedloedd Unedig i adnabod y rhai y mae arnynt fwyaf angen cymorth a'u hatal rhag gwneud siwrneiau peryglus i'r DU. Mae'r cynlluniau hyn yn cynnwys y ‘Cynllun Ailsefydlu Pobl Agored i Niwed o Syria’ a’r ‘Cynllun Ailsefydlu Plant Agored i Niwed’.

Cynllun a ariennir gan Lywodraeth Cymru sy'n darparu cymorth mentora, hyfforddiant cyflogaeth a chyfleoedd dysgu iaith i ffoaduriaid. Rheolir y prosiect gan Goleg Caerdydd a'r Fro ac mae'n cynnwys colegau eraill ledled Cymru.

Gall Llywodraeth y DU roi cymorth i geiswyr lloches y gwrthodwyd eu cais a'u hapeliadau. Gelwir cymorth dan yr amodau hyn yn gymorth Adran 4. Mae Adran 4 o Ddeddf Mewnfudo a Lloches 1999 yn rhoi'r pŵer i Lywodraeth y DU roi cymorth. Mae rhagor o wybodaeth am sut i hawlio ar gael yma:
https://www.gov.uk/asylum-support/how-to-claim

Gall ceiswyr lloches yr ystyrir eu bod yn ddiymgeledd neu ar fin bod yn ddiymgeledd wneud cais am gymorth ‘Adran 95’ gan Lywodraeth y DU. Gall y cymorth hwn fod yn gymorth ariannol yn unig os oes gennych rywle i aros, neu arian a llety os nad oes gennych rywle i aros. Ar hyn o bryd (Ebrill 2019), mae cymorth lloches yn £37.75 y pen yr wythnos. I gael llety, rhaid i chi gytuno i gael eich symud i unrhyw le yn y DU, heb gael dewis i ble.

Math dros dro o gymorth yw hwn, tra bo Llywodraeth y DU yn penderfynu ar eich cais am gymorth adran 95. Dylai penderfyniad ynghylch cais am gymorth adran 98 gael ei wneud o fewn un diwrnod gwaith.

Gall ceiswyr lloches yr ystyrir eu bod yn ddiymgeledd neu ar fin bod yn ddiymgeledd wneud cais am gymorth ‘adran 98’ gan Lywodraeth y DU. Os byddwch yn cael cymorth adran 98, bydd gofyn i chi wneud cais am gymorth adran 95.

Fel arfer, caiff cymorth adran 98 ei gynnig ar sail llety a phob pryd bwyd mewn canolfan Llety Cychwynnol.

Nid yw cymorth adran 98 ar gael i'r rhai sy'n disgwyl am benderfyniad ynghylch eu cais am gymorth adran 4.

Nod y Ddeddf hon yw gwella llesiant pobl y mae angen gofal neu gymorth arnynt yng Nghymru. Mae llesiant yn golygu bod person yn hapus, yn iach ac yn gyfforddus gyda'i fywyd a'r hyn y mae'n ei wneud.

Mae'r gyfraith yn ei gwneud yn ofynnol i cynnal ‘asesiad llesiant’ er mwyn canfod y ffordd orau o ddiwallu eich anghenion. Os ydych chi'n geisiwr lloches a wrthodwyd, gall asesiad llesiant arwain at lety neu gymorth arall os canfuwyd fod ar eich teulu angen cymorth ac y byddai gwrthod y cymorth hwnnw yn tramgwyddo ar eich hawliau dynol.